Adan la vi tala pèsonn pé pa séré ayen
Sèl bagay ou sé séré sé senti anba bouden
Sé vansé san gadé pas i pa ni baliz
Yo di mwen sé la kriz, sé le biz. CHEESE !
A fòs tan fè tan fè tan
Modèrnité douvan douvan
Ti manmay ka jis bay tèktonik
Komédi lèkzistans konpozé san mizik
Ou pa ni kanmarad ? Pa fann : ou ni an mobil !!
« Konpè High tech la pou réléw pa tout fil »
Chouval bwa ka pran kat viza because teknoloji sé mèt
Demen maten ou key chatté épi kòw mèm anlè le net
Pyé pou tèt. Tèt pou zépòl. Zépòl pou tjè. Tjè pou TJA ! Ni an tjak
San mèm sav sa nou lé nou an òrbit anlè Barack
Balé douvan la pòt an kay rèd san aspiratè
Ek sé pa san aspirasyon ou kay rivé pa wè pli klè
Yo di mwen sé la kriz, sé le biz. CHEESE
Glo-balizé. Mon-dyalizé. Banalizé. Asèpt-izé. Izé izé
Izé anba plat pyé ka maché si tèt anèstézyé
Sé vansé san gadé pas i pa ni baliz
Yo di mwen sé la kriz, sé le biz. CHEESE !
Ni an lopyòm o ra pòch nou yo ka kriyé konsomasyon
A bo di ke nou libéré sé nouvo mèt labitasyon
Kaz nèg vinn an lajòl béton
Misyé li mè mi an boutjé bèl flè siman
Gadé’y byen pas sésité sé’an malkadi pou vèglé konsyans
Sé dan sité yo kal-é nou kon dan’an bato an erans
Jòdi jou travèsé-a san lanmè
A pa vlé di Dousinn léta pé pa vinn anmè
Yo di mwen sé la kriz. Sé le biz. Tchipppppppppppp !
Man tann yo di : « Pa ni ayen »
Mépri pri an larèl zagryen
Mè sé an pa douvan ka mennen lòt
Sé vapè ka lévé kouvèti sikòkòt
Yo di mwen ni la kriz. Mwen’m ka di sé bétiz. Cheese !
A vré di mwen las lisid, asid, ransid
A fòs a fòs, jwi la viya ka vinn frigid
Mè sé vansé, sé fè, sé di. Pas pyès mirak pè key rivé
Tjè rebèl kon di poèt-la pa pou bout anlè révé
Espéré san atann anlè lòt sé an gadé douvan an chay
Ek sé pa pyès gadé zafè key sa fè manniman an zay
Véyé zafèw dan an sèl koultans, an sèl konsyans, an sèl konfyans
An sèl jwisans, an sèl dans, an sèl vivans
Nou sé an dansité disidan nan sité
An vwa ki pa ni kòd mè ki kapasité
Nou sé an dansité disidan nan sité
An vwa ki pa ni kòd mè ni vivansité
Simone (Lagrand)
Rétrolien(0)
|
Adresse URI pour un rétrolien sur cet article
Flux RSS pour les commentaires